Curso na Asociación de Amas de Casa

Nas próximas semanas estarei facendo un curso na Asociación Albariño de Amas de casa de Cambados, irei subindovos as receitas e fotos para que poidades velo.

O xoves da semana pasada fixemos "Cañitas da Aldea" e aprendemos a facer varios recheos diferentes: Trufa de chocolate, Crema pasteleira e de laranxa e unha variante de recheo salgado.

Preme na imaxe para acceder ás receitas.

Engadindo o recheo das nosas cañitas.

Con unhas pinches moi traballadoras.

Como podedes ver quedou un bo resultado final, espero que as alumnas/os  disfrutasen da miña primeira clase. E das que iremos facendo nas próximas semanas.

Podedes acceder ós enlaces das receitas pinchando na pizzarra que pon "RECEITAS DO PRIMEIRO DÍA DE CURSO". 

Diego Cordeiro.

  

Cañitas da aldea e recheos

Ingredientes para 75 unidades:

•     150 ml. aceite de xirasol
• 150 ml. Leite
• 150 ml. Viño branco
•   Fariña (a que admita)
•  Anís
•   Sal

Nun recipiente pesamos o aceite de xirasol, a leite e o viño branco. O aceite de xirasol podemos poñelo ó lume cunha pel de limón, para perfumalo e darlle un sabor máis intenso ás nosas “cañitas”. Engadímoslle un chorriño de anís o gusto, unha chisca de sal e pouco a pouco fariña ata conseguir unha masa homoxénea, maleable e que non se pegue ás mans.

Deixamos repousar durante uns 15 minutos.

Collemos unha cuarta parte da masa e estirámola ben. Coa axuda dun coitelo cortamos tiras do mesmo tamaño e imos enrolando sobre un molde sen que sobresaia da parte superior, para evitar que se nos rompa o desmoldalos.

O seguinte paso e fritilas en aceite de xirasol ben quente. Ó rematar, escorremos ben de aceite e desmoldamos en quente, que é moito máis sinxelo.

Para rematar, so falta reenchelas coa crema que máis nos guste. Pódese botar por riba con azucre glass ou decorar con chocolate e gránulo de améndoas. Tamen podemos facelas para un aperitivo, preparando un recheo salgado co que teñades pola casa ou máis vos guste, como salpicón de atún.  

     Ingredientes:

• ½ litro leite
• ½ litro zume laranxa
• 150 gr. azucre
• 90 gr. maicena
• 3 xemas de ovo
• 3 ovos
• 25 gr. manteiga
• Sal

Poñemos ó lume nun cazo a leite con unha pel de laranxa e noutro cazo o zume de laranxa. Sempre hai que poñelos por separado, xa que, a leite e os cítricos a temperatura ambiente córtanse. Unha vez quentes non hai perigo.

Noutro cazo preparamos a fariña, o azucre, e a maicena. Removemos ben coa axuda dunha variña para desfacer completamente os grumos. Terminamos engadindo os ovos, as xemas, a manteiga fundida, unha chisca de sal e mesturamos.

Incorporamos a leite e o zume xa quentes a esta mestura e poñémola ó lume. Removemos ata que comece a ferver, ten que quedar unha crema homoxénea e sen grumos. Deixar arrefriar.

   Ingredientes:

• 1 litro leite
• 150 gr. de azucre
• 50 gr. fariña
• 50 gr. maicena
• 25 gr. manteiga
• 2 ovos
• 5 xemas de ovo
• ½  rama de canela
• A pel dun limón e laranxa
• Sal

Poñemos ó lume o leite nun cazo, con un anaco de canela en rama e unha pel dun limón e dunha laranxa.

Noutro cazo preparamos a fariña, a maicena e o azucre e removemos ben con unha variña ata desfacer calquera grumo. Terminamos por engadir os ovos, as xemas, a manteiga derretida e un chisco de sal, seguimos removendo ata que se integren por completo todos os ingredientes.

Incorporamos a esta mestura o leite quente e poñemos ó lume removendo con unha variña ata que levante un fervor. Arrefriar ben e xa se pode utilizar para reencher calquera torta ou doce.

   Ingredientes:

• 1/2 litro de nata
• 350 gr. cobertura de chocolate
• ½ nata para montar

Poñemos o lume nun cazo ½ litro de nata e no momento que levante o fervor apartamos do lume e engadímoslle o chocolate e removemos ben, ata que quede totalmente integrado coa nata.

Metemos na neveira ata que este ben fría.

Para montala temos que incorporarlle ½ litro de nata e batemos ata que esponxe e quede maleable, pero que se manteña.

Diego Cordeiro.

Pizza Wok

    Sigo fusionando distintas culturas culinarias, sempre tentando unir pratos moi representativos. Neste caso foron Italia e China, dous países que me apaixonan culinariamente falando, xa que aportan sabores moi definidos e aromáticos.

Ingredientes para a masa:

      ·       300 gr. fariña

      ·       200 ml. Auga

      ·       20 gr. levedo

      ·       Sal

      ·       20 gr. aceite de oliva

    Facemos un cráter coa fariña e no seu interior poñemos a auga, o sal e o aceite de oliva. Amasamos enerxicamente ata conseguir unha masa elástica que non se pegue ó mesado. Para rematar, incorporamos o levedo e continuamos amasando ata incorporala ben. Deixamos levedar a masa durante 30 minutos.

Ingredientes para o Wok:

      ·       100 gr. Luras

      ·       100 gr. polo

      ·       50 gr. gambas

      ·       50 gr. cogomelos

      ·       ½ pemento amárelo

      ·       ½ pemento vermello

      ·       ½ cebola

      ·       ¼ de col chinesa

      ·       Albaca (alfábega)

      ·       30 ml. Aceite de oliva

      ·       50 gr. queixo parmesano

      ·       Salsa de soia

      ·       Sal

      ·       pementa branca

  

         O primeiro que facemos e cortar o polo en dados e as luras en toros e salpementamos.

        Poñemos lume forte á tixola wok con aceite de oliva e cando este ben quente engadimos o polo e as luras,  removemos durante un minuto. De seguido incorporamos as verduras cortadas en anacos, menos a col, e seguimos remexendo para que se douren por igual os ingredientes.

        O seguinte é incorporar a col chinesa, a albaca e as gambas, e mollamos coa salsa de soia, deixamos un minuto máis o lume e apartamos.

        Para terminar estiramos a masa  ó gusto,  esparexemos na superficie o salteado do wok  e relamos queixo parmesano por riba.

        Introducimos no forno, previamente prequentado a 220ºC, durante uns 10 minutos.

                                                                                        Diego Cordeiro.

TORTA MOZART

   A semana pasada estaba de aniversario una persoa moi especial e fíxenlle unha torta para a ocasión. Decidinme por unha moi rica, a torta Mozart, moi saborosa e chea de matices.

Ingredientes para masa de galleta:

     ·       300 gr. Fariña

     ·       200 gr. manteiga

     ·       100 gr. azucre moreno

     ·       Sal 

   Nun bol mesturamos a fariña coa manteiga a temperatura ambiente ata obter unha masa homoxénea. Engadimos o azucre e un chisco de sal e amasamos.

  Formamos tres bolas do mesmo tamaño e estiramos coa axuda dun rodo dándolle forma circular cun grosor aproximado de 3mm.

   Introducimos no forno a 150ºC durante 25 minutos ata que colla unha pouca de cor e retiramos para que arrefríe, xa que, ó quitalo do forno inda estará brando. Manipular con moito coidado para que non se nos rompan as bases de galleta.

Ingredientes para a mousse de chocolate: 

     ·       250 gr. de chocolate

     ·       6 claras

     ·       40 gr. de azucre

     ·       300 gr. nata

   Fundimos o chocolate nun bol e reservamos.

   Montamos noutro bol as claras co azucre e tamén reservamos.

  E noutro bol montamos a nata, e mesturamos con moito coidado para que non se baixe co chocolate e as claras montadas. O resultado será una crema esponxosa e delicada.

Ingredientes para a mazá caramelizada:

     ·       200 gr. mazá Grand Smith

     ·       25 gr. manteiga

     ·       30 gr. azucre moreno

     ·       Canela

     ·       Amaretto

   Fundimos a manteiga nunha tixola e engadimos a mazá pelada e cortada en cadrados pequenos. Espolvoreamos con canela e azucre moreno e deixamos caramelizar. Cando vaia a quedarse sen líquido mollamos con licor de amaretto e reducimos.

   Engadimos a mazá  a mousse de chocolate.

   Para o montaxe poñemos un disco de galleta na base e botamos a metade da mousse de chocolate sobre ela, e cubrimos con outro disco e repetimos a mesma operación.

  Refrixeramos durante dúas horas. Rallamos unha onza de chocolate e decoramos os laterais da torta. Para a superficie polvoriñamos cacao en po e decoramos con mazá cortada en anacos e unha rama de canela.

   Estou seguro que vos vai gustar moito esta torta, non dubidedes en facela xa que é moi sinxela de preparar.

                                                                             Diego Cordeiro.

                                            

ENSALADA DE COL CHINESA, MOZZARELA, PANCETA SALTEADA E SALSA DE IOGUR

Acercase o verán e xa empeza a apetecer pratos lixeiros e frescos, tipo ensalada. E nesta ocasión optei por un ingrediente moi utilizado en América como é a col  para facer unha ensalada, sen dubida dálle un toque crocante moi agradable na boca.

Ingredientes para 4 persoas:

     ·       700 gr. col chinesa

     ·       100 gr. queixo mozzarela

     ·       100 gr. panceta

     ·       80 gr. champiñóns

     ·       ½ cebola

     ·       1 iogur

     ·       3 culleradas maionesa

     ·       1 limón

     ·       Salsa de soia

     ·       cecimbre

O primeiro paso vai ser facer a salsa de iogur para a que poñemos nun bol 1 iogur natural, 3 culleradas de maionesa, o zume dun limón, un chorriño de salsa de soia e cecimbre picada. Mesturamos ben coa axuda dunha culler ata que quede una salsa totalmente homoxénea.

Lavamos a col e a cortamos en xuliana fina, facemos o mesmo con media cebola e incorporamos a salsa de iogur. Removemos ben para que quede completamente impregnada na salsa e reservamos.

Cortamos a panceta en bastóns e salteamos nunha tixola con un pouco de aceite de oliva. No mesmo aceite salteamos uns champiñóns laminados.

Empratamos poñendo a col na base do prato e vamos poñendo enriba a panceta, os champiñóns e uns anacos de mozzarela.

Sen dubida gustaravos moito esta combinación de texturas e sabores, a col aporta un toque crocante, a panceta un toque salgado e a mozzarela un toque ácido.                                                

                                                           DIEGO CORDEIRO.

                                   

Espuma de Tiramisú (Sifón)

      Este Nadal recibín dunha persoa moi especial un agasallo que me encanta, un sifón para facer espumas e cremas con unas texturas moi delicadas. Sempre me encantou probar cousas e sabores co sifón, pero sempre foi no traballo, agora irei probando cousas con máis liberdade na casa. Este foi o primeiro resultado.

Ingredientes:

     ·       125 gr. mascarpone

     ·       125 gr. azucre glass

     ·       25 ml. Licor de Amareto

     ·       25 ml. Café

     ·       200 ml. Nata

     ·       1 xema de ovo

     ·       Cacao en po

     ·       1 carga para o sifón

      

      O primeiro que facemos e votar nun bol o queixo, a nata e o azucre glass, poderiamos usar azucre normal pero teriamos que colar a mestura ou fervelo azucre coa nata para disolvelo se non poderíase atascar o sifón, e batemos para conseguir unha mestura máis cremosa.

      Engadimos a xema de ovo, o licor  de amareto, que aportaralle ese sabor e aroma tan característico do tiramisú, e unha cunca de café. Removemos ata conseguir unha incorporar completamente todos os ingredientes.

     

      Introducimos no sifón, cerramos e poñemos unha carga de gas de sifón.      Reservamos no frigorífico durante 12 horas antes usalo para que a mestura se estabilice por completo.

     Para terminar votamos sobre unha copa de Martini ou prato de sobremesa e polvoriñamos con cacao en po por encima.

                                                                                  Diego Cordeiro.

                                              

Empanada de Bacallau con Catañas

   Probablemente probastes empanadas de todo tipo e de todos os sabores posibles. Pero estou seguro que nunca saboreastes unha de bacallau e castañas, ocorréuseme nun momento de inspiración ou de tolemia non o teño moi claro, xa que non é unha combinación moi usual e moito menos para o recheo dunha empanada. Estou seguro que non vos decepcionará.

Ingredientes para a masa:

     ·       500 gr. fariña

     ·       1 ovo

     ·       30 gr. levedo

     ·       50 ml. leite

     ·       50 ml. aceite do rustrido

     ·       Sal

     ·       Auga a que admita.

   Poñemos a fariña nun bol e facemos un volcán e no seu interior incorporamos o ovo, leite, sal, o aceite do sofrito que lle dará cor e sabor a nosa masa e imos engadindo auga ata acadar una textura manexable e elástica.         Por ultimo engadímoslle o levedo e amasamos enerxicamente. Reservamos tapado con un pano ata que dobre o seu volume.

Ingredientes para o recheo:

     ·       2 cebolas

     ·       ½ pemento vermello

     ·       ½ pemento verde

     ·       400 gr. bacallau

     ·       150 gr. castañas

     ·       1 culler de pementón doce

     ·       Sal

     ·       100 ml. Aceite de oliva

    O primeiro que facemos é pelar e cocer as castañas ( eu sempre teño un puñado xa peladas no conxelador para ter fora da época de outono).

    O seguinte é preparar o rustrido para a empanada no que poñemos aceite nunha tixola e pochamos a cebola e pemento picados en anacos. Engadimos o bacallau desalgado e cortado en cadradiños e poñémoslle a culler de pementón e a sal. Deixamos cocer durante 5 minutos a lume baixo. Por ultimo incorporamos as castañas xa cocidas e removemos co rustrido para que se mesturen os sabores.

    

     Estiremos a metade da masa que fará de base, e poñémola nunha bandexa de forno. Enriba repetimos o rustrido sobre toda a superficie. Estiramos a outra metade e tapamos a bandexa, cortamos os sobrantes e facemos o peche polos lados para que non se escape o recheo. Facemos un pequeno burato no centro para que saian os vapores durante a cocción e pintamos con ovo toda a superficie da empanada.

   Introducimos no forno previamente quentado durante 20-25 minutos a 185ºC.                                                                     Diego Cordeiro.